САД во борба против скапото гориво: Ослободуваат уште 53 милиони барели нафта од резервите

Американското Министерство за енергетика синоќа објави дека ќе ослободи дополнителни 53,3 милиони барели нафта од Стратешките резерви со цел да се стабилизира пазарот погоден од војната меѓу САД и Иран.

Мерката е дел од поширок глобален план за намалување на енергетската криза и инфлаторните притисоци.

— реклама —

Оваа испорака е дел од американската обврска на пазарот да пласира вкупно 172 милиони барели нафта. На глобално ниво, повеќе од 30 држави, под координација на Меѓународната агенција за енергија, планираат да ослободат околу 400 милиони барели.

— реклама —

Од почетокот на конфликтот, цената на суровата нафта пораснала за околу 45 проценти, односно за приближно 30 долари по барел.

Главна причина за кризата останува затворањето на Хормушкиот Теснец, низ кој пред војната минувале околу 20 проценти од светските испораки на нафта и гас.

— реклама —

Според аналитичарите, дневно се блокирани меѓу 10 и 12 милиони барели сурова нафта и покрај алтернативните рути што ги користат Саудиска Арабија и Обединетите Арапски Емирати.

Американските Стратешки резерви се најголемите резерви на нафта за итни случаи во светот и се одржуваат од 1975 година. Досега од нив на пазарот веќе биле пуштени околу 35 милиони барели.

Минатата година глобалната потрошувачка на нафта изнесувала околу 103 милиони барели дневно, поради што ваквите интервенции се сметаат за неопходни за спречување дополнителен удар врз светската економија.