Соединетите Американски Држави воведоа нов пакет санкции против 10 лица и субјекти кои, според американското Министерство за финансии, биле вклучени во набавка на оружје, компоненти и технологија за иранскиот воен сектор.
Санкционираните лица и компании се поврзани со активности во Кина, Хонгконг, Пакистан, Саудиска Арабија и Турција. Вашингтон тврди дека мрежата обезбедувала делови и опрема за иранското Министерство за одбрана и логистика на вооружените сили.
Со санкциите се замрзнува имотот и имотните интереси на таргетираните лица и субјекти што се наоѓаат во САД или се под контрола на американски лица. На американските граѓани и компании им е забрането да вршат трансакции со нив.
Меѓу санкционираните е и Сејед Асгар Ализадех Табатабаи, за кого американските власти тврдат дека бил претставник на иранското Министерство за одбрана во Пекинг и координирал набавки на готови оружени системи и компоненти со двојна намена од Кина.
Од американското Министерство за финансии велат дека целта на мерките е да се отежне развојот и обновувањето на иранските воени капацитети, како и да се зголемат трошоците за мрежите што обезбедуваат делови и технологија за иранските оружени програми.
Новите санкции се дел од пошироката политика на администрацијата на Доналд Трамп за ограничување на пристапот на Иран до финансии, технологија и воени компоненти. Во изминатите месеци Вашингтон воведе слични мерки против повеќе меѓународни мрежи поврзани со набавки за Иранската револуционерна гарда и Министерството за одбрана.
Најновиот пакет доаѓа во период кога паралелно продолжуваат дипломатските контакти меѓу Вашингтон и Техеран. Според „Ројтерс“, Катар посредува во индиректни разговори меѓу двете страни, додека санкциите, војната и иранската нуклеарна програма остануваат меѓу клучните прашања.
