Поморскиот сообраќај низ Ормускиот Теснец бележи значителен пад по најновата ескалација меѓу САД и Иран. Во текот на вчерашниот ден низ теснецот поминале само четири товарни бродови, покажуваат прелиминарните податоци за поморскиот сообраќај, објавени во средата.
Според податоците на компанијата „Кплер“, на кои се повикува „Ројтерс“, бројката е значително помала од претходниот ден, кога биле регистрирани 10 бродови, како и од десетдневниот просек од околу 13 бродови дневно.
Меѓу бродовите што вчера поминале низ Ормускиот Теснец имало еден многу голем танкер за превоз на сурова нафта, танкер од типот „Панамакс“, брод од типот „Камсармакс“ и танкер со средна големина. Еден брод влегол во теснецот, додека три го напуштиле.
Податоците може дополнително да бидат променети, бидејќи дел од бродовите вообичаено ги исклучуваат транспондерите за време на пловидбата.
Падот на сообраќајот следува по најновиот бран американски воздушни напади врз Иран во вторникот, по што Иран возврати, што претставува една од најсериозните ескалации меѓу двете земји во последните неколку недели.
Иранската револуционерна гарда соопшти дека американските напади дополнително ќе го ограничат сообраќајот низ Ормускиот Теснец, еден од најважните поморски коридори во светот. Пред почетокот на конфликтот, низ овој теснец се транспортираше нафта во количина еквивалентна на околу една петтина од светската потрошувачка.
Во меѓувреме, низ Баб ел-Мандеб, уште еден значаен поморски премин на Блискиот Исток, во вторникот поминале 18 товарни бродови. Седум бродови влегле во теснецот, а 11 го напуштиле, додека десетдневниот просек изнесувал околу 24 бродови дневно.
Меѓу бродовите што поминале низ Баб ел-Мандеб имало два танкера од типот „Афрамакс“ и еден танкер од типот „Суезмакс“.
