Само седум бродови минале низ Ормускиот теснец, загриженоста за безбедноста расте

Само седум бродови што превезуваат суровини вчера поминале низ Ормускиот теснец, што е речиси половина од бројот регистриран еден ден претходно. Податоците од сервисот за следење на бродови „Кплер“ укажуваат на зголемена загриженост за безбедноста на поморскиот сообраќај на Блискиот Исток, додека преговорите за мир меѓу САД и Иран и натаму се во застој.

— реклама —

Од седумте пловила, четири влегле во теснецот, а три излегле од него. Пред почетокот на војната во февруари, низ оваа стратешки важна поморска рута минувала речиси една петтина од светскиот транспорт на сурова нафта и течен природен гас.

Меѓу седумте бродови немало супертанкери за сурова нафта, ниту танкери за течен природен гас. Сепак, податоците покажуваат дека низ Ормускиот теснец, по иранската рута, поминал еден многу голем танкер за гас кој превезувал пропан и бутан.

— реклама —

Намален сообраќај е забележан и во Баб ел Мандеб, уште еден клучен поморски премин за глобалната трговија. Во четвртокот низ теснецот поминале вкупно 23 бродови што превезуваат суровини, во споредба со по 34 бродови во секој од претходните два дена.

— реклама —

Од 23-те пловила, 16 влегле во Баб ел Мандеб, додека седум го напуштиле теснецот. Меѓу оние што излегле имало и два танкера со сурова нафта наменета за Виетнам и Индија.

И во Баб ел Мандеб во четвртокот немало поминато супертанкери за сурова нафта или танкери за течен природен гас.

Намалувањето на бројот на пловила низ двете стратешки поморски точки доаѓа во момент кога безбедноста на поморскиот сообраќај во регионот останува под сериозна загриженост, а дипломатските напори за постигнување мир меѓу Вашингтон и Техеран не бележат напредок.