Сашко Кедев влезе во Гинисовата книга на рекорди како највозрасен човек што ги искачил сите 14 врвови над 8.000 метри

Македонскиот кардиолог, професор и алпинист Сашко Кедев доби место во Гинисовата книга на рекорди како највозрасната личност во светот што ги искачила сите 14 планински врвови повисоки од 8.000 метри.

— реклама —

Историскиот подвиг го завршил на 20 јули 2025 година, кога го освоил Гашербрум I, на возраст од 63 години и 14 дена, со што го комплетирал предизвикот за искачување на највисоките планини во светот.

Кедев е роден на 6 јули 1962 година, а зад себе го има и предизвикот „Седумте врвови“, односно искачувањето на највисоките точки на сите седум континенти. Овој подвиг го реализирал од 14 јануари 2008 година, кога го освоил Аконкагва во Јужна Америка, до 6 ноември 2011 година, кога го искачил Пункак Џаја, познат и како Пирамида Карстенц, во Океанија.

— реклама —

На листата од 14 врвови повисоки од 8.000 метри се Еверест, Манаслу, Дхаулагири I, К2, Брод Пик, Анапурна I, Нанга Парбат, Чо Оју, Макалу, Лхоце, Гашербрум II, Шиша Пангма, Канченџунга и Гашербрум I.

— реклама —

За неговите заслуги во медицината и историскиот алпинистички успех, Кедев во ноември минатата година беше одликуван со Орден „8 Септември“ од претседателката Гордана Сиљановска-Давкова.

При доделувањето на признанието, Кедев истакна дека подвигот го смета за национален успех, посветен на сите Македонци.

— реклама —

„Тоа што ми даде сила беше токму тоа да го однесам македонското знаме и македонското име на сите врвови. Тој успех го посветувам на сите граѓани и сите Македонци каде и да се во светот“, порача Кедев.