Од СДСМ обвинија дека премиерот Христијан Мицкоски со месеци упатува навреди кон граѓаните, посочувајќи дека во своите јавни настапи користел квалификации како „талог на општеството“, „мекотели“, „коленичари“ и „медиокритети“.
Од партијата велат дека ваквите изјави се недозволиви за премиер и оценуваат дека, наместо да се извини, Мицкоски продолжува со навредите и преку своите постапки.
Во соопштението, СДСМ тврди дека премиерот, заедно со лидерот на Демократската партија на Србите во Македонија, Иван Стоилковиќ, ги навредувал и пратениците во Собранието.
Партијата ја поврза и неодамнешната ослободителна пресуда во предметот „Талир 2“, враќањето на „Белата палата“ и ослободувањето на Никола Груевски и Драган Павловиќ Латас, оценувајќи дека со тоа се испраќа порака дека криминалот се штити.
„Премиерот нема право од собраниската говорница да ги навредува граѓаните, ниту да го штити криминалот и криминалците. Тоа не е сила, туку ароганција и презир кон граѓаните“, наведуваат од СДСМ.
Од опозициската партија прашуваат кога Мицкоски ќе им се извини на сите граѓани кои, според нив, биле навредени од неговите изјави.
