СДСМ обвини дека Владата предводена од премиерот Христијан Мицкоски ја задолжува државата речиси секоја седмица и оцени дека економската политика се сведува на постојано ново задолжување.
Од партијата посочуваат дека на 14 јули државата се задолжила со седум милиони евра од државните претпријатија, на 29 јули со 25 милиони евра од Светската банка, а на 5 август со нови 41 милион евра преку обврзници.
„За само три недели – нов долг од над 70 милиони евра. За две години над 2,5 милијарди евра ново задолжување. Ова не е економска политика. Ова е политика на постојано задолжување за покривање на тековни трошоци и тендери“, велат од СДСМ.
Од опозициската партија додаваат дека, според нив, инфлацијата ги намалува платите и пензиите, цените на основните производи и горивата растат, минималната плата е непроменета, а потрошувачката кошница постојано се зголемува.
Воедно, СДСМ тврди дека Македонија изгубила над 60 милиони евра од ИПА-фондовите за пругата кон Бугарија на Коридорот 8, бидејќи Владата не избрала изведувач, поради што, како што наведуваат, средствата ќе треба да се обезбедат со ново задолжување.
„Оваа Влада нема економска стратегија. Има само стратегија за преживување преку задолжување – на грбот на граѓаните и на идните генерации“, се наведува во соопштението на СДСМ.
