Христијан Мицкоски денеска повторно ја најави својата нова стратегија: кога во јуни ќе се покаже дека нема напредок во реформите, виновен ќе биде СДСМ затоа што го „блокирал“ Изборниот законик, велат од СДСМ како реакција на изјавата на премиерот Христијан Мицкоски.
„Ова е класична лага на Мицкоски.
ВМРО-ОКГ има апсолутно мнозинство во Собранието.
Токму како што го укинаа техничката влада без ниту еден глас од СДСМ, така можат да го донесат и Изборниот законик.
Не им треба СДСМ за закони – им треба изговор кога ќе пропаднат.
Мицкоски помпезно ветуваше дека „наскоро од Брисел ќе стигне вест дека сме рамо до рамо со Црна Гора“.
Сега однапред подготвува алиби зошто тоа нема да се случи. Затоа што во јуни нема да ги внесе малцинства во Уставот, нема да ги затвори 8-те отворени реформски точки и нема да ги реши проблемите што самиот ги создаде: криминал, корупција, контрола врз судство и обвинителство, 40% од медиумите дел од Орбановата мрежа.
Мицкоски лажеше за враќање на името, лажеше за укинување на Преспанскиот договор, лажеше за „трета економија во Европа“.
Сега подготвува нова лага – дека СДСМ е виновен за неговиот неуспех.
Нема да нè вовлече во своите лаги.
Мицкоски може да продолжи со лаги, да ветува и да бара виновници.
Граѓаните јасно гледаат: единствениот кој ја блокира Македонија кон Европа е токму тој – Мицкоски и неговата криминална организација“, се вели во реакциајта.
Мицкоски за СДСМ: Тие не се борат за победа на наредните избори, туку за опстанок на раководството во партијата
Во врска со обвинувањата од страна на опозицијата дека нема напредок во исполнување на реформската агенда премиерот Хирстијан Мицкоски ги замоли граѓаните пораките кои доаѓаат од СДСМ да ги прифааќаат со резерва.„Би ги замолил граѓаните сите оние пораки што доаѓаат од страна на опозицијата да ги прифаќаат со резерва, бидејќи целта на оваа опозиција не е да испрати точна порака или да биде конструктивна и да понуди решение, туку целта е со лаги и шпекулации да привлече внимание. Тие не се борат на следните избори да победат, туку се борат ова раководство и понатаму да остане раководство во опозицијата.Во смисла на тоа што го зборувам, а и во таа насока, е и шпекулацијата поврзана со застој во реализирањето на реформската агенда. Вчера имавме долг состанок со ресорните министри во Владата, кои треба до крајот на јуни да ги доиспорачаат веќе започнатите чекори. Можам да кажам дека сите оние 10 што се заостанати, со исклучок на 2, ќе бидат испорачани.Првиот е оној дел во кој се бара од државата да не обезбедува 100% електрична енергија за домаќинствата и за сите корисници на електрична енергија од снабдувачот, бидејќи цениме дека тоа што го прифатила претходната Влада, ако ние го продолжиме и го прифатиме, тогаш сметките за електрична енергија на домаќинствата ќе бидат за 25% до 30%, па и повеќе, поскапи. Тука свесно нема да одиме во реализација на тој чекор, бидејќи сакаме да го заштитиме стандардот на граѓаните.Вториот чекор е Изборниот законик. Знаете дека тој се носи со консензус. СДСМ ја напушти работата на групата што работи на Изборниот законик и, сè додека е таа одлука, ние Изборниот законик не можеме да го донесеме.Сè останато ќе биде завршено и сè останато ќе биде уште еден демант на лагите што ги испраќа СДСМ на тие дневни прес-конференции“, изјави Мицкоски.
Македонија | пред 2 часа
