СДСМ преку соопштение обвини дека само околу два месеца по последниот ребаланс, Владата повторно најавува можност за прекројување на Буџетот, оценувајќи дека тоа ќе биде проследено со ново задолжување.
Од партијата тврдат дека приходите се пониски од очекуваното и дека буџетскиот дефицит се зголемува. Според нив, до крајот на годината дефицитот ќе надмине 900 милиони евра.
СДСМ ја отфрла оценката дека буџетските проблеми се должат на намалениот ДДВ за горивата, тврдејќи дека Владата не се откажала од акцизата и не го намалила ДДВ на горивата на 5 отсто.
Од партијата потсетуваат дека претседателот Венко Филипче, како што наведуваат, со месеци предупредувал на влошување на состојбата со државната каса и зголемување на буџетската дупка.
СДСМ оценува дека станува збор за, како што велат, неуспех на економските политики на Владата и тврди дека најавениот ребаланс ќе биде проследен со ново задолжување.
„Сè што најавивме се случува. Задолжувањето од 1,3 милијарди евра е веќе на хартија“, наведуваат од партијата.
Од СДСМ тврдат и дека за две години власта го задолжила народот со 4 милијарди евра, додека јавниот долг, според нив, достигнал околу 11 милијарди евра, односно околу 60 отсто од БДП.
„Долговите растат а пари за поголеми плати и пензии нема“, наведуваат од СДСМ, додавајќи дека, според нив, граѓаните ја плаќаат цената за политиките на Владата.
