Соединетите Американски Држави и Иран сигнализираат дека се блиску до постигнување договор за ставање крај на воениот конфликт, а висок американски претставник изјавил дека двете страни веќе се согласиле за текстот на документот и дека Вашингтон очекува негово потпишување во наредните денови.
Иранскиот министер за надворешни работи Абас Аракчи изјави дека конечни измени сѐ уште се можни, но оцени дека прелиминарниот договор покажува оти Иран излегол посилен од конфликтот.
„Иран е победник во војната со САД“, изјави Аракчи за државната телевизија.
И покрај напредокот во преговорите, тензиите не стивнуваат целосно. Неколку часа по изјавите, американските сили собориле повеќе ирански дронови кои се движеле кон Хормушкиот теснец. Од американската војска соопштиле дека леталата претставувале закана за комерцијалниот бродски сообраќај и дека пловниот пат останува отворен.
Според информации од извори вклучени во преговорите, предложениот меморандум предвидува повторно отворање на Хормушкиот теснец и укинување на американската поморска блокада на иранските пристаништа.
Во замена, САД би почнале да ослободуваат милијарди долари замрзнати ирански средства и би укинале дел од санкциите поврзани со извозот на нафта.
Едно од клучните прашања останува иднината на иранската нуклеарна програма. Американската страна инсистира на демонтирање на програмата и уништување на залихите високо збогатен ураниум, додека Техеран бара да задржи дел од материјалот во изменета форма.
Западни дипломатски извори наведуваат дека договорот би можел да биде потпишан веќе во недела, а како најверојатна локација се споменува Женева.
Израел, пак, порача дека нема да биде дел од договорот. Премиерот Бенјамин Нетанјаху изјавил дека Израел не се чувствува обврзан со евентуалниот меморандум, додека израелскиот министер за одбрана нагласил дека земјата нема намера да се повлече од позициите што ги контролира.
Договорот, доколку биде финализиран, би претставувал прв значаен чекор кон деескалација на кризата која сериозно го наруши транспортот на нафта и гас низ еден од најважните светски поморски коридори.
