Се поставуваат фотоволтаици и се подобруваат условите во повеќе образовни установи во Свети Николе

Подобрувањето на условите во образовните установи во Свети Николе продолжува со инвестиции во енергетска ефикасност и уредување на објектите. Во повеќе училишта и градинки се поставуваат фотоволтаици, а се реализираат и други инфраструктурни зафати.

— реклама —

Министерката за образование и наука, проф. д-р Весна Јаневска, денеска го посети Свети Николе, каде заедно со градоначалникот Дејан Владев изврши увид во тековните активности.

— реклама —

„Драго ми е што локалната самоуправа во континуитет се труди да гради поквалитетно образование на локално ниво, а тоа е идентична цел и на Владата и Министерството за образование и наука на национално ниво. Секако, кога целите се идентични, заложбите се многу поефективни. Инфраструктурата е еден од основните предуслови за да имаме добар воспитно-образовен процес“, рече Јаневска.

Таа му се заблагодари на градоначалникот за, како што истакна, грижата за најмладите и порача со таквите активности да продолжи и во иднина.

— реклама —

Владев информираше дека станува збор за инвестициски циклус вреден околу 13 милиони денари. Со средствата се поставуваат фотоволтаици во три основни училишта и две градинки, а во дел од установите се уредуваат и дворовите.

Во Средното општинско училиште „Кочо Рацин“ се поставуваат фасада и покрив, со средства обезбедени од Владата преку повикот за финансирање капитални проекти на општините.