Пратеничката на СДСМ, Јована Тренчевска, на денешната прес-конференција обвини дека власта немала искрена намера да спроведе реформи на Изборниот законик, туку, како што рече, целта била „изборен грабеж и манипулација со гласовите на дијаспората“.
„Се потврди дека намерата на власта не беше ниту за реформи, ниту за подобрување на Изборниот законик, туку само за изборен грабеж и манипулација со 200.000 гласови на дијаспората“, изјави Тренчевска.
Таа оцени дека ВМРО-ДПМНЕ нема политички капацитет за консензус и дека не покажува искрена намера за политички дијалог.
„Нема што СДСМ да се договара со опозицијата. Проблемот е кај власта, кај Мицкоски, кој сака да манипулира со 200 илјади гласови“, рече Тренчевска.
Таа праша што се случило со тврдењата на ВМРО-ДПМНЕ дека веќе има договор со Левица и ДУИ во врска со измените на Изборниот законик, додавајќи дека, според неа, власта ја манипулира јавноста.
Според Тренчевска, електронското гласање и гласањето по пошта биле предлози кои, како што тврди, требало да овозможат изборен инженеринг.
Таа нагласи дека предложените измени би се применувале дури од изборите во 2029 година, што, според неа, остава доволно време за изработка на сигурен и кредибилен модел преку широка јавна дебата и политички консензус.
