„Седам во четири ѕида и секој ден ја преживувам кобната ноќ“, кажа газда Деко во судницата во Идризово

На денешното рочиште за пожарот во дискотеката „Пулс“, сопственикот Дејан Јовановски – Деко се изјасни дека не е виновен за обвиненијата за тешки дела против општата сигурност. Во своето обраќање пред судот, тој даде подолга изјава, наведувајќи дека и самиот сè уште се справува со последиците од трагедијата во која загинаа 63 лица.

„До ден денес се чудам и не можам да поверувам што се случи таа вечер“, изјави Јовановски. Тој додаде дека цели девет месеци е во притвор „во четири ѕида“ и дека секој ден го минува со истата мисла: „Секојдневно ја преживувам таа трагична ноќ.“

— реклама —

Јовановски зборуваше со треперлив глас, а на моменти со солзи во очите. „Не можам да поверувам што се случило таа ноќ“, рече тој.

Во продолжение тој нагласи дека никогаш не би дозволил неговиот клуб да претставува опасност за гостите:

— реклама —

„Јас како човек и како родител, каде што се собираа сите млади и моите деца, да бидам способен да дозволам да фали нешто? Зарем сериозно мислите дека доколку би знаел дека фали нешто, не би презел се за да се отстрани навреме?“

— реклама —

Тој посочи дека во клубот низ годините израснале десетици генерации и дека сите што го познаваат знаат „колку и како се грижев за безбедноста на сите гости во клубот“.

„Од срце и од душа сакам да изразам сочувство до сите фамилии што имаат починати, а на повредените оздравување. Затоа што ја знам нивната болка и тага, затоа што и ние во нашата фамилија имаме починат и повреден член“, додаде тој.

— реклама —

Во одбраната го спомена и неговиот син Михајло, кој е обвинет во предметот. „Мојот син Михајло е обвинет бидејќи тој немаше никакви обврски и активности ниту пак допринел кон тоа што се работеше на клубот. Тој имаше негова фирма за дистрибуција, си ги работеше неговите работни обврски со неговата фирма и си беше нормален гостин како и сите“, рече Јовановски.

Со денешното изјаснување на првообвинетиот продолжува судскиот процес за утврдување на одговорноста за најголемата трагедија од ваков вид во земјата.