Високите температури и силниот ветер го отежнуваат справувањето со пожарите во земјата. Во последните 24 часа се регистрирани 37 пожари на отворен простор, а пожарот кај Чаниште, според директорот на ДЗС, Стојанче Ангелов, е најголемиот ова лето.
Селото Чаниште во моментов е надвор од опасност, но пожарот се движел кон Мариово, односно кон Крушевица. На терен се ангажирани екипи на ДЗС, пожарникари од Прилеп и четири возила „Пинцгауер“, а во гаснењето учествува и полициски хеликоптер. Силниот ветер и непристапниот терен дополнително ја отежнуваат интервенцијата.
Ангелов информираше дека сите пожарникари и лица ангажирани во гаснењето се безбедни, но во текот на ноќта работник со багер се повредил на ногата, при што се очекуваат дополнителни информации за неговата состојба.
„Во секој момент важно е да немаме опасност за ниту едно село. Сите пожарникари и сите лица што учествуваат во гаснењето на пожарот се живи и здрави“, изјави Ангелов.
Тој упати апел до граѓаните да бидат особено внимателни и да не палат оган на отворен простор.
„Ова е најголемиот пожар ова лето. Иако има ретки грмушки и ретка шума, со слаб квалитет, сепак тоа е вегетација и се бориме да ја спасиме“, порача Ангелов.
Пожарот на депонијата во Делчево е ставен под контрола, додека во повеќе општини во земјата пожарникарите изгаснаа други пожари. ЦУК повторно апелираше до граѓаните при појава на пожар веднаш да го пријават на бројот 112.
