Семејството на американскиот претседател Доналд Трамп заработило најмалку 2,3 милијарди долари од криптопроекти што ги промовирало по изборите во 2024 година, додека повеќе од еден милион инвеститори забележале нето загуби во приближно ист износ, покажува истрага на агенцијата Ројтерс.
Според анализата, која се темели на блокчејн записи, корпоративни документи, јавни објави и разговори со експерти од криптоиндустријата, четири проекти се во центарот на вниманието – World Liberty Financial, мем-криптовалутата $TRUMP, American Bitcoin и AI Financial Corp.
Ројтерс наведува дека кај сите проекти се повторувал сличен модел: семејството Трамп вложувало малку или воопшто не вложувало сопствени средства, ги промовирало проектите користејќи го своето име и политичкото влијание, а потоа остварувало значителна заработка, додека малите инвеститори купувале средства чија вредност подоцна драстично опаѓала.
Еден од најилустративните примери е 29-годишната Фатима Елргдави од Калифорнија, која инвестирала 2.000 долари во криптовалутата $TRUMP, верувајќи дека станува збор за сигурна инвестиција бидејќи зад неа стои Трамп. Неколку месеци подоцна, вредноста на нејзината инвестиција паднала на помалку од 120 долари.
Најголем профит, според истрагата, остварил проектот World Liberty Financial, кој на семејството Трамп му донел повеќе од 1,6 милијарди долари. Мем-криптовалутата $TRUMP, пак, донела околу 616 милиони долари, додека инвеститорите изгубиле над 700 милиони долари.
Осум експерти за владина етика, цитирани од Ројтерс, оцениле дека станува збор за судир на интереси без преседан во современата американска историја, имајќи предвид дека семејството на актуелниот претседател заработува од индустрија која истовремено е предмет на регулација од неговата администрација.
Од Белата куќа ги отфрлија обвинувањата, истакнувајќи дека сите постапки на претседателот Доналд Трамп и неговата администрација се преземаат во интерес на американските граѓани и дека ниту тој, ниту неговото семејство, не се впуштиле во судир на интереси.
