Серафимовски: Зголемена поддршката за зелена нафта, доделувањето на картичките започнува оваа недела

Доделувањето на првите картички за зелена нафта за земјоделците ќе започне во текот на оваа недела, најави министерот за земјоделство, шумарство и водостопанство Борче Серафимовски. За мерката се обезбедени 584 милиони денари, а поддршката е зголемена за 12,3 проценти.

„Во пресрет на есенската обработка и подготовката на нивите, во текот на оваа недела започнуваме со доделување на првите картички за зелена нафта. За оваа мерка обезбедивме 584 милиони денари. Поддршката ја зголемивме за 12,3 проценти, со што директно го намалуваме трошокот за гориво во период кога земјоделците повторно влегуваат на нивите“, рече Серафимовски на прес-конференцијата одржана заедно со директорот на Државниот инспекторат за земјоделство, Ивица Ангеловски.

Министерот најави дека во следниот период приоритет ќе биде и исплатата на финансиската поддршка од два денари за килограм јаболко од бербата во 2024 година, предадено до 30 јуни 2025 година. За оваа мерка се предвидени околу 150 милиони денари, а налозите за исплата веќе се подготвени. Ќе бидат исплатени сите производители кои навреме поднеле барање и ги исполнуваат условите.

— реклама —

Во однос на откупот на винското грозје, Серафимовски информираше дека процесот е во завршна фаза. Винариите досега прифатиле и преработиле речиси 80 милиони килограми грозје, вклучително и сопственото производство, додека дополнително се извезени околу 13 милиони килограми. Вкупната количина достигнува околу 93 милиони килограми набрано грозје.

Во завршна фаза се и административните постапки за кредитната линија преку Развојната банка, наменета за финансирање на откупот на винско грозје. Целта е да се зајакне ликвидноста на винариите и да се создадат услови за исполнување на обврските кон лозарите.

Серафимовски се осврна и на откупот на куртовската капија, посочувајќи дека според последните информации просечната откупна цена во прилепскиот регион достигнала 25 денари за килограм при предавање во откупен центар.

— реклама —

Во двата најголеми производни региони за оваа сорта досега се откупени вкупно 44 милиони килограми пиперка – 11 милиони во откупните центри во Кривогаштани и 33 милиони во Струмица. Извозот достигнал 15 милиони килограми, што е близу до целокупното минатогодишно ниво од 15,5 милиони килограми, додека откупот сè уште трае.

На прес-конференцијата беше посочено и дека со измените на Правилникот за квалитет на млекото и млечните производи се ограничува употребата на млеко во прав, реконституирано млеко и палмино масло во производството. Максимално дозволената количина на овие состојки треба да изнесува од 1 до 2 проценти.

— реклама —

Серафимовски го претстави и Предлог-законот за уредување на пазарите со земјоделски производи, кој е ставен на јавна расправа. Предложените решенија предвидуваат писмени договори пред испораката, регистрирани откупувачи, однапред утврдени услови за откуп, точна евиденција и рокови за плаќање.

Министерот ги повика земјоделците, здруженијата и иницијативните групи да се вклучат во јавната расправа и да достават забелешки и предлози преку ЕНЕР или до подрачните единици на Министерството.

Директорот на Државниот инспекторат за земјоделство, Ивица Ангеловски, информираше дека при контролите на откупот биле изречени 30 инспекциски мерки и биле издадени 17 платни налози. Од нив, три се платени, додека за преостанатите 14 се води прекршочна постапка пред Прекршочната комисија во Министерството за земјоделство, шумарство и водостопанство.

— реклама —

Ангеловски соопшти дека во текот на 2026 година, заклучно со 15 септември, Државниот инспекторат за земјоделство извршил вкупно 873 вонредни инспекциски надзори кај регистрирани правни лица кои вршеле откуп на земјоделски производи.

При контролите најчесто биле утврдувани откуп без договори со производителите, неисплатени обврски, непочитување на роковите за исплата, неистакнати ценовници, непоседување верификувани мерни инструменти и откуп без упис во регистарот на откупувачи.

Од Инспекторатот најавија дека контролите кај откупувачите ќе продолжат и во наредниот период, со цел заштита на правата и интересите на земјоделските производители, а за утврдените неправилности ќе се преземаат соодветни инспекциски мерки согласно законските прописи.