Шефот на „Рајанер“ одби да се извини откако конкурентите ги нарече „силувачи со високи цени“

Извршниот директор на „Рајанер“, Мајкл О’Лири, одби да се извини за изјавата во која конкурентските авиокомпании ги нарече „силувачи со високи цени“, и покрај повикот од Даблинскиот центар за жртви на силување да се извини.

О’Лири, говорејќи пред годишното собрание на акционери на „Рајанер“, ги обвини конкурентите дека наплаќаат превисоки цени и рече дека патниците „очајно ги сакаат ниските цени на „Рајанер“ бидејќи не можат да си дозволат да летаат со европските силувачи кои држат високи цени“.

— реклама —

На прашањето дали смета дека ваквиот речник е соодветен, тој одговори потврдно, додавајќи дека ќе продолжи да ги навредува „Бритиш ервејс“, „Луфтханза“ и другите авиокомпании со високи цени.

Заменик-премиерот на Ирска, Сајмон Харис, оцени дека речникот на О’Лири е несоодветен и дека тој треба да ја повлече или да ја исправи изјавата.

— реклама —

По неговите коментари, директорката на Даблинскиот центар за жртви на силување, Рејчел Морог, му испратила писмо во кое го обвини дека со ваквите изјави се обидува да привлече медиумско внимание. Таа навела дека центарот добил повици од жртви кои биле вознемирени и потресени од неговите зборови.

— реклама —

Морог му понудила и едукација за последиците од сексуалното насилство, како и можност да се извини.

О’Лири, сепак, одбил. Тој навел дека му е целосно јасно дека ниту една негова изјава не може да ја намали тежината на „грозоморниот злостор“, но оценил дека не го релативизирал силувањето и затоа нема да се извини ниту ќе ја прифати понудената едукација.

Ова не е првпат О’Лири да користи навредлив речник во јавноста. Во 2004 година, наводно, сопствениците на аеродромот Станстед ги нарекол „куп силувачи кои премногу наплаќаат“, во текот на спор околу аеродромските такси.

Тој во минатото користел навредливи изрази и за дел од своите вработени и за патници кои барале враќање на средствата за билетите.