Шест активни пожари беснеат низ земјава, два се под контрола

На територијата на земјава до 13 часот денеска се регистрирани 12 пожари на отворен простор, од кои шест и натаму се активни, два се ставени под контрола, а четири се целосно изгаснати, информира Центарот за управување со кризи.

— реклама —

Активни се пожарите во општина Студеничани, на потегот Моране – Вртекица – Рамни Габер, каде што гори мешана шума, како и во Македонски Брод, на месноста Видуш кај Драгов Дол и кај Локвица, каде што е зафатена ниска вегетација, нискостеблеста шума и грмушки.

— реклама —

Пожар има и во општина Новаци, на потегот Маково – Црничани – Рапеш, каде што гори ниска вегетација и деградирана шума. Активен е и пожарот кај селото Слп во Велес, каде што се зафатени ниска вегетација и ретка дабова шума.

Меѓу активните пожари се и оној кај Копанце во општина Јегуновце, каде што гори шума, како и пожарот кај Зајас во општина Кичево, каде што е зафатена нискостеблеста шума.

— реклама —

Под контрола се пожарите на потегот Алданци – Норово во Крушево, каде што гори нискостеблеста деградирана дабова шума, и пожарот на градската депонија во Делчево.

— реклама —

Во текот на денот се изгаснати четири пожари – кај Лознани и Вашарејца во општина Могила, кај Лопатица во Битола, кај Сушево во Штип и на улицата „Иво Лола Рибар“ во Тетово.