Американската телевизија Си-Ен-Ен објави анализа во која оценува дека јавноста не добива доволно информации за американската воена кампања против Иран, наведувајќи дека Пентагон веќе два и пол месеци нема одржано прес-конференција, а министерот за одбрана Пит Хегсет не ја објаснил воената стратегија зад последните воздушни напади.
Според анализата, за разлика од претходните воени конфликти, кога претставници на американската војска редовно одговарале на прашања од новинарите, денес пристапот до информации е значително ограничен. Си-Ен-Ен наведува дека Хегсет вовел построги ограничувања за медиумите и го намалил обемот на официјалните информации што ги објавува Министерството за одбрана.
Телевизијата пишува дека новинарите што ја следат војската сè почесто се принудени да се потпираат на анонимни извори, иако Хегсет неодамна најавил формирање работна група за откривање и гонење на лицата што оддаваат доверливи информации.
Според анонимни извори цитирани од повеќе американски медиуми, Пентагон не објавил детали за неодамнешните напади врз американските сили во Јордан и Ирак, во кои имало повредени војници и оштетена воена опрема.
„Њујорк тајмс“ објави дека Иран извршил уште три напади врз американските сили во Јордан, при што биле повредени десетици војници, но Пентагон не ги потврдил овие информации ниту објавил податоци за последиците.
Во анализата се наведува и дека администрацијата на претседателот Доналд Трамп не соопштила како војната влијаела врз американските резерви на оружје, ниту како Иран успеал да ги зачува и обнови своите ракетни капацитети.
Во меѓувреме, Трамп продолжува јавно да тврди дека САД имаат целосна надмоќ над Иран, додека дел од американските медиуми укажуваат на несогласување меѓу официјалната реторика и информациите што протекуваат од безбедносните кругови. Анализата на Си-Ен-Ен заклучува дека недостигот од транспарентност отвора сè повеќе прашања за текот и стратегијата на американската воена операција.
