Сиљановска-Давкова се сретна со претседателката на турската Црвена полумесечина

Претседателката Гордана Сиљановска-Давкова денеска се сретна со Фатма Мерич Јилмаз, претседателка на турската Црвена полумесечина и членка на Советот на претседателот на Турција. На средбата присуствуваше и претседателката на македонскиот Црвен крст, Лилјана Ристевска.

Сиљановска-Давкова ја оцени соработката меѓу Црвениот крст и турската Црвена полумесечина, воспоставена во 1995 година, како значаен придонес за развојот на пријателските односи меѓу Македонија и Турција.

— реклама —

Таа истакна дека сè посложените хуманитарни предизвици бараат поголема меѓународна солидарност, координирана помош и премин од реактивно кон превентивно дејствување. Според неа, зајакнувањето на регионалната соработка и размената на знаења, искуства и добри практики можат да придонесат за побрз и поефикасен одговор при кризи.

— реклама —

Претседателката го поздрави проширувањето на постојните и започнувањето нови заеднички проекти на двете организации, насочени кон помош на ранливите категории граѓани и во воени и во мирнодопски услови.

Фатма Мерич Јилмаз ја претстави улогата на турската Црвена полумесечина и нејзината меѓународна мрежа, посочувајќи ја долгогодишната соработка со македонскиот Црвен крст преку програми, донации и обуки. Таа нагласи дека во моментов посебно внимание се посветува на лицата постари од 65 години, кои ги оцени како една од најзапоставените категории граѓани.

— реклама —

Јилмаз потсети и на помошта што Турција им ја испрати на граѓаните на Скопје по катастрофалниот земјотрес во 1963 година, како и на македонската помош за турските граѓани по земјотресот во Турција во 2023 година.

Таа посочи дека по скопскиот земјотрес било изградено ново училиште, кое денес го носи името „Македонија“.

На средбата, Јилмаз ѝ подари на Сиљановска-Давкова архивски записи и историски фотографии што ја документираат помошта на турската Црвена полумесечина по земјотресот во Скопје во 1963 година.