Претседателката Гордана Сиљановска Давкова, одговарајќи на новинарски прашања, се осврна на можноста за комуникација и идни политички разговори со Бугарија, во контекст на политичките промени во таа држава.
„Го познавам господинот Радев, убедена сум дека ќе биде успешен премиер, како што беше претседател, се разбира дека го контактирав, и со порака и устно поразговаравме, и изразивме подготвеност за разговори. Мислам дека само тој би можел автентично да одговори што може понатаму да се направи, или пак премиерот“, изјави Сиљановска Давкова.
Таа нагласи дека стабилноста на институциите и владите е клучна за реален дијалог меѓу државите.
„Фактот што имаме стабилна влада зад која стои големо мнозинство граѓани, покажува дека постои можност да се разговара со легитимен претставник на народот. Со нестабилни влади, тоа е многу потешко“, додаде претседателката.
