Претседателката Гордана Сиљановска-Давкова денеска во Охрид им посака успешен почеток на првачињата од ООУ „Св. Климент Охридски“, со порака училиштето да биде место каде што ќе стекнуваат знаење, ќе градат пријателства и ќе учат да се почитуваат меѓусебно.
На свечениот прием, таа ги охрабри најмладите ученици да бидат љубопитни, да читаат, пишуваат и поставуваат прашања, нагласувајќи дека вистинската цел не треба да бидат само добрите оценки, туку стекнувањето знаење.
Сиљановска-Давкова истакна дека образованието е темел на личниот и општествениот развој и една од најдобрите инвестиции во себе. Според неа, учењето освен знаење носи и самостојност, толеранција и способност за критичко размислување.
Осврнувајќи се на училиштето што го носи името на Свети Климент Охридски, претседателката ги потсети првачињата на значењето на Климент и Наум како најистакнати ученици и следбеници на светите браќа Кирил и Методиј, повикувајќи ги да го продолжат нивното просветителско и духовно дело.
Таа порача дека училиштето треба да биде безбедно и инспиративно место каде секое дете ќе се чувствува прифатено и почитувано, а заедништвото и другарството ќе бидат важен дел од ученичкиот живот.
