Сиљановска-Давкова: За силна држава се потребни функционални институции, не само избори

По повод 35 години од независноста на Република Македонија, под покровителство на претседателката Гордана Сиљановска-Давкова беше одржана панел-дискусија „Предизвици, одлуки, решенија“, на која учествуваа политичари и непосредни учесници во процесите поврзани со осамостојувањето и создавањето на современата македонска држава.

— реклама —

Во воведното обраќање, претседателката Сиљановска-Давкова истакна дека со стекнувањето на независноста е изграден институционален систем, но оти неговото континуирано унапредување е од особено значење, со почитување на човековите права и демократските начела.

— реклама —

Поранешниот пратеник Петар Гошев посочи дека одбележувањето на државноста не треба да се сведува само на празниците од поновата историја. Тој нагласи дека не треба да се заборават ниту асномските основи, кои ги оцени како еден од клучните темели на современата македонска државност.

Насер Зибери зборуваше за односот меѓу остварувањето на правата и лојалноста кон државата, оценувајќи дека тие се од суштинско значење за нејзината стабилност и просперитет. Тој се осврна и на состојбите во земјата кон крајот на деведесеттите години, особено на прашањето за остварувањето на правата на албанската заедница.

— реклама —

Поранешната пратеничка Џулистана Марковска се осврна на одлуките со кои таа и нејзините колеги биле соочени во периодот на одржувањето на референдумот за независност, посочувајќи дека станувало збор за одлуки што суштински го определиле понатамошниот развој и обликување на државата.

На панелот говореа и Панде Колемишевски, Благој Ханџиски, Славе Наумовски, Мухамед Халили, Ламбе Аранудов и Туше Гошев. Тие споделија сведоштва и искуства од почетокот на деведесеттите години, кога како директни учесници во политичките процеси биле вклучени во носењето на одлуките поврзани со осамостојувањето и изградбата на независната македонска држава.