Турската фудбалска репрезентација се најде во центарот на скандал уште пред да го одигра својот прв натпревар на Светското првенство 2026.
На социјалните мрежи се прошири видео на кое се гледаат неколку турски репрезентативци како пушат на балконот од хотелот во кој е сместена селекцијата. На снимката е препознаен дефанзивецот на Фенербахче, Чаглар Сојунџу, во друштво на уште двајца соиграчи.
Видеото брзо стана вирално и предизвика бројни реакции кај турските навивачи. Дел од нив ги осудија фудбалерите, додека на социјалните мрежи се појавија и шпекулации дека не станува збор за обични цигари, туку за џоинт. Засега нема официјална потврда за таквите тврдења.
„Веќе не заслужуваш да бидеш во репрезентацијата, а сега уште и пушиш“, гласи еден од коментарите на револтираните навивачи.
Турција обезбеди пласман на Светското првенство по 24 години пауза, откако во баражот ги елиминираше Романија и Косово. На Мундијалот ќе настапува во групата Д, заедно со домаќинот САД, Парагвај и Австралија.
Својот прв натпревар Турците го играат против Австралија, а селекторот Винченцо Монтела сè уште не се огласил во врска со инцидентот. Се очекува притисокот врз репрезентативците и стручниот штаб дополнително да се зголеми доколку тимот не оствари позитивен резултат на отворањето на турнирот.
