Со кого договара Мицкоски за дата-центрите под радарот – на кого му ги поклонува водата, земјата и струјата?, прашува СДСМ

СДСМ бара Владата да ги објави сите детали за преговорите со потенцијални инвеститори за изградба на дата-центри во Македонија, обвинувајќи го премиерот Христијан Мицкоски дека најавува транспарентност, а истовремено не открива со кои компании се разговара и под кои услови.

Од партијата велат дека Мицкоски самиот признал дека Владата преговара со пет до шест потенцијални инвеститори, но дека јавноста нема информации за нивните имиња, условите што им се нудат, ниту за можните договори.

„Која е компанијата? Со кого и за што точно се преговара? Кои услови им ги нуди Владата? Нема одговори. Нема имиња. Нема договори. Нема анализи. Нема бројки“, наведуваат од СДСМ.

Опозициската партија тврди дека ова не може да се нарече транспарентен процес, туку „работа зад затворени врати“.

Посебно прашање, според СДСМ, е потрошувачката на вода и електрична енергија што би ја имале идните дата-центри.

Од партијата предупредуваат дека јавноста не знае колку вода и струја би трошеле овие објекти и дали тоа би можело да влијае врз земјоделството, водоснабдувањето и цената на електричната енергија.

— реклама —

„Македонија нема ресурси за експерименти зад затворени врати. Особено не со водата“, велат од СДСМ.

Во соопштението се прави и врска со проблемите со водоснабдувањето и случајот со загадената вода во Гостивар, при што партијата оценува дека Владата не смее да договара големи потрошувачи на вода без претходно да објави соодветни анализи.

Слична критика упатуваат и во однос на енергетскиот систем.

— реклама —

„Македонија нема стабилен енергетски систем за Мицкоски однапред да ветува државни ресурси без јавноста да знае колку ќе чини тоа и кој ќе ја плати сметката“, наведуваат од СДСМ.

Од партијата додаваат дека немаат ништо против инвестиции што носат развој, нови технологии и работни места, но инсистираат тие да бидат во интерес на државата.

СДСМ поставува и прашање за економскиот ефект од евентуалните дата-центри, тврдејќи дека ваквите инвестиции не отвораат голем број работни места, а можат да бидат значајни потрошувачи на струја и вода.

— реклама —

„Што ќе јаде народот? Килобајти?“, саркастично прашуваат од партијата.

Од СДСМ бараат пред јавноста да бидат ставени договорите, анализите и точните услови под кои се водат преговорите со инвеститорите.

„Прво договорите и анализите на маса. Потоа приказните за инвестиции“, порачуваат од партијата.