На денешната прес-конференција, Маја Борозан обвини дека Владата предводена од Христијан Мицкоски нетранспарентно турка проекти за изградба на дата-центри, за кои од опозициската партија предупредуваат дека би можеле да имаат сериозно влијание врз потрошувачката на електрична енергија и водните ресурси во земјата.
Борозан изјави дека, според СДСМ, зад најавите за инвестиции се кријат прашања за тоа колкави количества струја и вода ќе бидат потребни за функционирањето на ваквите центри.
Таа посочи дека, покрај Пехчево, компанија јавно соопштила дека за дата-центри во Македонија од Владата добила обезбеден капацитет од 100 мегавати електрична енергија и директен пристап до реката Вардар за потребите на ладење. Борозан праша зошто Владата досега не ги објавила овие информации и какви обврски презела државата.
Од СДСМ предупредуваат дека големата потрошувачка на електрична енергија би можела да доведе до зголемен увоз, а со тоа го отворија и прашањето дали евентуалните трошоци би се одразиле врз цената на електричната енергија за граѓаните.
„Кој гарантира дека граѓаните нема да плаќаат повисока цена за струјата за некој друг да прави огромни профити?“, праша Борозан.
Како дополнителен ризик, СДСМ ја посочува и потрошувачката на вода за ладење на дата-центрите. Борозан побара одговор дали ваквите проекти би можеле да влијаат врз расположливите количества вода за земјоделството и наводнувањето.
Од опозициската партија обвинија дека земјоделците би можеле да бидат дополнително погодени доколку водните ресурси се пренасочуваат за потребите на дата-центрите, а притоа нема јавна и транспарентна постапка.
СДСМ побара Владата да ги објави сите информации за планираните дата-центри, нивните потреби за електрична енергија и вода, како и условите под кои се реализираат проектите.
