Шпанија оваа недела ги регистрираше двата најтопли јунски дена откако се вршат мерења, откако интензивниот топлотен бран предизвика рекордно високи температури во повеќе делови од земјата.
Според прелиминарните податоци на шпанската метеоролошка служба АЕМЕТ, вторник бил најтоплиот јунски ден на шпанското копно од почетокот на мерењата во 1950 година, при што просечната температура на национално ниво била за 7,1 Целзиусов степен над вообичаените вредности за овој период.
Агенцијата соопшти дека и понеделник се вбројува меѓу најтоплите јунски денови досега, додека неделата се најде меѓу десетте најтопли денови регистрирани во историјата.
Иако во четвртокот температурите благо се намалија во поголемиот дел од земјата, северните региони и натаму се соочуваа со екстремни горештини, поради што беа издадени и црвени предупредувања.
Во Билбао, температурите надминаа 40 степени Целзиусови во три различни дена во текот на неделата, што е првпат таква вредност да биде регистрирана трипати во една година. Во регионот Кантабрија, пак, беше измерена рекордна температура од 43,7 степени Целзиусови.
Прелиминарните податоци покажуваат дека меѓу неделата и средата најмалку 212 смртни случаи се поврзуваат со последиците од екстремните горештини.
Од АЕМЕТ предупредуваат дека топлотните бранови во Шпанија стануваат сè почести и поинтензивни. Додека во периодот од 1975 до 1984 година земјата просечно имала само три дена топлотен бран годишно, во последната деценија оваа бројка се зголемила на 22 дена.
Метеоролозите забележуваат и значително зголемување на таканаречените „тропски ноќи“, кога температурите не паѓаат под 20 степени Целзиусови. Во Барселона, бројот на вакви ноќи пораснал од просечни 19 на околу 80 годишно, додека во Мадрид се зголемил од 16 на 52 ноќи годишно.
Според АЕМЕТ, главната причина за овие промени се климатските промени предизвикани од човековата активност. Проекциите покажуваат дека до крајот на векот Шпанија би можела да има меѓу 47 и 77 дена топлотен бран годишно, во зависност од нивото на глобалните емисии на штетни гасови.
