Шпанија нема да се приклучи на „Одборот за мир“ инициран од американскиот претседател Доналд Трамп, соопшти шпанскиот премиер Педро Санчез, наведувајќи загриженост околу мандатот на телото и фактот што во него не е вклучена палестинската страна. Изјавата следуваше по неформалниот состанок на лидерите на Европската Унија во Брисел.
Санчес истакна дека одборот е надвор од рамките на Обединетите нации и дека во неговата структура не е опфатена Палестинската управа.
„За иднината на Газа треба да одлучуваат Палестинците“, изјави тој, додавајќи дека мирниот и безбеден соживот со Израел мора да се обликува преку дијалог меѓу Израел и Палестина, заснован на решение со две држави, непречен влез на хуманитарна помош и гаранции за траен мир.
Шпанскиот премиер нагласи дека Мадрид го цени упатениот повик, но го одбил од причини на доследност во надворешната политика, која, како што рече, се темели на меѓународното право и мултилатералните институции. Тој додаде дека Шпанија ќе продолжи да работи на мировниот процес заедно со европските партнери и меѓународната заедница.
Досега, повеќе од 20 држави се согласија да се приклучат на одборот, меѓу кои Турција, Египет, Катар, Саудиска Арабија, Израел, Аргентина, Унгарија, Пакистан, Виетнам и Албанија. Поканата ја одбија Франција и Норвешка, додека Трамп ја повлече претходно упатената покана до Канада.
Претседателот на Европски совет изјави дека европските лидери имаат сериозни сомнежи околу повеќе елементи од повелбата на одборот, вклучително и неговиот опсег, начинот на управување и усогласеноста со Повелбата на Обединетите нации. Иако иницијативата првично била замислена како тело за надзор на прекинот на огнот и обновата на Газа, повелбата го проширува мандатот и на градење мир во сите подрачја погодени од конфликти или изложени на ризик од нив.
