Шпанија во сезоната со најголем ризик од шумски пожари влезе со значително намалени воздушни капацитети, откако осум хеликоптери „Камов Ка-32“ беа приземјени поради санкциите што Европската Унија ѝ ги воведе на Русија.
Според шпанскиот весник La Razón, хеликоптерите не можат да летаат бидејќи поради санкциите не е можно да пристигнат руски техничари за задолжителното одржување, ниту да се набават резервни делови неопходни за нивно безбедно користење.
Овие летала со години беа едни од најважните средства во борбата против шумските пожари бидејќи можат за неколку секунди да исфрлат повеќе од 5.000 литри вода. Пожарникарите истакнуваат дека нивната прецизност и голем капацитет значително придонесуваат за ставање на пожарите под контрола.
Шпанската влада официјално призна дека противпожарните капацитети се ослабени, а осумте хеликоптери што претходно дејствуваа од бази во Андалузија, Арагон, Екстремадура и Гвадалахара остануваат надвор од употреба.
Според порталот The Objective, Мадрид досега не побарал од Брисел техничко изземање што би овозможило овие летала повторно да летаат. Предлогот за вакво изземање, поднесен од парламентарната група „Сумар“, не добил поддршка.
Во меѓувреме, приватните компании што обезбедуваат противпожарни услуги почнаа да ги повлекуваат хеликоптерите „Камов“ од своите флоти, оценувајќи дека нивното одржување повеќе не е правно и технички изводливо.
Поради тоа, шпанските власти се принудени да бараат замена на западниот пазар, но според владини извори, достапните алтернативи се поскапи и имаат послаби оперативни способности. Сè додека се во сила европските санкции кон руската воздухопловна индустрија, Шпанија ќе мора да се справува со шумските пожари без еден од своите најмоќни воздушни ресурси.
