Шпанските власти продолжуваат со интензивната борба против големите шумски пожари во околината на Мадрид и соседната покраина Авила, каде што силниот ветер и понатаму ја отежнува ситуацијата. Поради опасноста, речиси 88.000 луѓе се евакуирани или добиле наредба привремено да останат во своите домови.
Пожарите, кои се сметаат за најголемата ваква криза во Шпанија годинава, ја натераа Владата да побара помош преку Механизмот за цивилна заштита на Европската Унија.
Во текот на денот се очекува пристигнување на четири противпожарни авиони „Канадер“ – два од Италија и два од Грција, откако помош веќе испратија Холандија и Португалија.
Поради опасноста од спојување на пожарите во регионот на Мадрид и Авила, шпанската Единица за вонредни состојби воспостави единствен команден центар за координација на операциите за гаснење. Досега огнот зафатил околу 20.000 хектари.
Шпанскиот премиер Педро Санчез предупреди дека претстојат тешки часови поради променливиот правец на ветерот и нагласи дека заштитата на населението останува главен приоритет. Според него, од почетокот на годината во пожарите изгореле повеќе од 130.000 хектари земјиште, значително повеќе отколку во истиот период лани.
Во гаснењето се ангажирани околу 3.000 припадници на итните служби, повеќе од 400 копнени возила и над 20 воздухоплови, со поддршка од полицијата, цивилната заштита и армијата.
Пожарот се приближува и до подрачјето Ел Ескоријал, западно од Мадрид, каде што пожарникарите поставуваат заштитни линии околу населените места. Во кампот „Монастерио де Пелајос“ изгореле околу 30 мобилни куќички, а евакуирани се околу 200 кампери. Засега нема информации за повредени.
Активни пожари има и во покраините Леон, Теруел и Кордоба, каде што исто така се спроведуваат превентивни евакуации на населението.
