Либерално-демократската партија предупредува дека, спротивно на оптимистичките оценки на премиерот Христијан Мицкоски, иселувањето од Македонија нема да запре, туку дополнително ќе се интензивира во наредните години. Како причини ги посочува состојбите во образованието, правосудството, здравството и економијата.
Од ЛДП оценуваат дека последните резултати во образованието покажуваат загрижувачко ниво на функционална неписменост кај младите и тврдат дека проблемите веќе не можат да се третираат како изолирани слабости.
Партијата остро го критикува и функционирањето на правосудниот систем, посочувајќи го предметот „Талир 2“ и ослободителната пресуда за поранешниот премиер Никола Груевски.
„Во оваа држава, за ситен криминал се одговара експресно, додека за најголемите коруптивни процеси постапките немаат завршница или завршуваат со ослободителни пресуди за кои дури и не се објавуваат пишани образложенија“, велат од ЛДП.
Во реакцијата партијата ја споменува и зградата на ВМРО-ДПМНЕ во центарот на Скопје, изнесувајќи тешки обвинувања за потеклото на средствата со кои била изградена. Станува збор за политички тврдења на ЛДП, а не за утврдена кривична одговорност со правосилна судска пресуда.
Критики има и за почетокот на новата учебна година, промените во наставните програми и односот на власта кон верските содржини во образованието. Прославата на независноста, пак, ЛДП ја квалификува како „коруптивен спектакл со приватизација на државни функции“.
Од партијата ги посочуваат и измените на Кривичниот законик, законите кои, според нив, со месеци се заглавени, како и недостигот од лекови на Онкологија, оценувајќи дека станува збор за симптоми на поширока институционална криза.
„По истиот овој коруптивен модел денес на сите им е јасно зошто бегаме од европските правила и зошто по истиот принцип паѓаат економијата, здравството и образованието“, се наведува во соопштението.
Токму ваквата состојба, според ЛДП, ќе има директни демографски последици.
„Спротивно од празниот оптимизам на премиерот, иселувањето од Македонија не само што нема да запре, туку драматично ќе се интензивира во наредните години како директна последица на ова лошо владеење“, тврдат од партијата.
Од ЛДП прашуваат каков мотив имаат младите професионалци и родителите да останат во држава во која, според нив, немаат доволна сигурност во здравството, правосудството и образованието.
„Кој нормален човек, млад професионалец или родител би останал да живее во земја каде што ги нема основните услови за здравје, правда и заштита на сопствените деца?“, прашуваат од ЛДП.
Партијата заклучува дека доколку не дојде до суштинска промена во начинот на функционирање на институциите, Македонија ќе се соочи со дополнително заминување на населението, особено на младите и квалификуваните кадри.
