„Срамен, скандалозен и без ронка емпатија настап на министерката за образование пред првачињата“, вели ЛДП

Либерално-демократската партија преку соопштение реагира на изјавата на министерката за образование и наука Весна Јаневска упатена до првачињата, во која им порача да побараат братче или сестриче за да се отворат затворените училишта.

Од ЛДП оценуваат дека ваквата порака е несоодветна за шестгодишни деца и дека министерката, како што велат, не размислила за различните семејни околности во кои живеат учениците.

— реклама —

„Да им порачаш на шестгодишни првачиња „да си побараат братче или сестриче за да се отвореле затворените училишта“ значи или дека воопшто не размислуваш пред да им се обратиш на децата, или дека си толку занесен од функцијата што веќе не ти е грижа за нивната емоционална состојба“, наведуваат од партијата.

Од ЛДП прашуваат дали министерката помислила на децата чии родители се разведени, на оние кои имаат само еден жив родител, како и на децата чии семејства се соочуваат со неплодност или со тешка економска состојба.

— реклама —

Според партијата, ваквата изјава може да создаде чувство на вина и непотребна болка кај дел од децата, но и да поттикне предрасуди меѓу самите ученици.

— реклама —

ЛДП дополнително ја критикува Јаневска поради нејзината професионална определба, посочувајќи дека таа е професорка на Медицинскиот факултет.

„Ако како медицинско лице не ги знае основните правила на детската психологија и развој, подобро е навреме да се консултира со стручњаци, наместо да им прави директна штета на најмладите со вакви непромислени и скандалозни јавни истапи“, велат од ЛДП.

Од партијата сметаат дека причините за затворањето на училиштата не треба да се бараат во тоа дали децата имаат брат или сестра, туку во демографските и економските проблеми, како и во иселувањето на младите семејства.

ЛДП бара министерката Јаневска и Владата јавно да им се извинат на децата и родителите кои, како што наведуваат, биле повредени од нејзината изјава.