Студентите во блокада во Србија од денеска до 20 септември продолжуваат со средбите и разговорите со граѓаните во повеќе места низ земјата, како дел од акцијата „Од врата до врата“. Паралелно, продолжува и нивната велосипедска тура „Чувари на Уставот“.
Во Сечањ, на велосипедистите им се приклучил и Илија Срдановиќ, прв на Студентската листа. Студентите утрово тргнале од Вршац, а во текот на денот планираат да стигнат до Зрењанин.
Срдановиќ бил пречекан со овации и аплауз, а по тој повод изјавил дека неговото присуство во Сечањ е поврзано со поддршката за младите.
„Потребно е да ѝ се даде поддршка на нашата младост“, рекол Срдановиќ.
Зборувајќи за називот на турата „Чувари на Уставот“, тој истакнал дека Уставот го смета за најважен правен акт во државата и нагласил дека студентите се залагаат за еднаквост пред законот.
„Само со гаранција дека го почитуваме Уставот, дека пред законот, како што е загарантирано со Уставот, сите сме еднакви, се бориме за таква Србија“, изјавил тој.
На прашањето како ќе се однесуваат во изборната кампања, Срдановиќ рекол дека ќе настапуваат на начин по кој граѓаните ги препознаваат, односно цивилизирано и во согласност со она што им го ветиле на студентите.
Тој истакнал дека ќе разговараат со луѓе кои имаат што да кажат и знаат што зборуваат, а одговорил и на прашањето дали би учествувал во директно соочување со претседателот Александар Вучиќ.
Срдановиќ претходно нагласувал дека не сака да биде нарекуван носител на листата, туку „прв меѓу еднаквите“. Според него, Студентската листа е формирана како листа на еднакви и токму еднаквоста ја издвоил како една од вредностите за кои се залагаат.
