Средба на Сиљановска-Давкова со претставнички на здружението „До бебе по патот на ин витро“

Претседателката Гордана Сиљановска-Давкова денеска се сретна со претставнички на здружението за хумана репродукција и биопотпомогнато оплодување „До бебе по патот на ин витро“.

На средбата присуствуваа претседателката на здружението Деспина Петровска и членките Наташа Ѓорѓиева Божинов и Марија Михајлоска Јанкуловска.

— реклама —

Сиљановска-Давкова им ја честиташе храброста на сите жени и мажи кои се одлучуваат да станат родители преку ин витро постапка, истакнувајќи дека станува збор за силни личности.

Таа го поздрави ангажманот на здружението, кое се залага за унапредување на правата на пациентите кои поминуваат низ ин витро процесот, но и за достоинствено мајчинство и родителство.

— реклама —

Претставничките на здружението ја информираа претседателката за нивните активности и посочија дека, според податоците на Светската здравствена организација, едно од шест лица се соочува со неплодност, при што соодносот меѓу мажите и жените е еднаков.

— реклама —

Како значајна промена ги посочија измените на Законот за здравствена заштита, со кои бројот на бесплатни ваучери за ин витро е зголемен од три на шест обиди, како и можноста лекот клексан да се издава на лекарски рецепт.

На средбата биле презентирани и повеќе барања и цели на здружението, меѓу кои зголемување на средствата за поквалитетна терапија при ин витро постапките, можност генетските испитувања и анализи да се вршат во МАНУ, како и пренаталните испитувања, наместо во странство, да се спроведуваат во државата.

— реклама —

Имајќи го предвид проблемот со наталитетот во државата, претставничките укажале на потребата од системска поддршка за лицата кои се соочуваат со неплодност.

Претседателката оценила дека поддршката за оваа категорија граѓани има значење не само за нив, туку и поширок, општествен ефект.