Стабилно е производството на струја, уверува Божиновска

Производството на електрична енергија во Македонија е стабилно, а цената по која ЕСМ ја продава произведената струја изнесува 65 евра за мегават-час, што е повеќе од двојно помалку отколку во периодот кога актуелната Влада ја презела функцијата. Ова го истакна министерката за енергетика Сања Божиновска, нагласувајќи дека се преземаат мерки за заштита на стандардот на граѓаните.

— реклама —

Божиновска, која одговараше на новинарски прашања по отворањето на саемот „Енерго Технома 2026“, рече дека ЕСМ обезбедува сигурно снабдување со електрична енергија по пониски цени. Таа посочи дека конечната одлука за цените на горивата ќе ја донесе Регулаторната комисија за енергетика (РКЕ) во понеделник, додавајќи дека пресметките на компаниите не значат автоматско поскапување.

— реклама —

Министерката потсети дека Владата досега ги намалувала акцизите и ДДВ-то за да го ублажи ценовниот притисок, додека ОКТА во неколку наврати понудила попусти на горивата. Актуелниот попуст, како што најави, ќе важи до следната недела, по што повторно ќе се анализираат состојбите на пазарот.

— реклама —

Во однос на природниот гас, Божиновска информираше дека ЕСМ ги има обезбедено потребните количества за ноември и преговара за подолгорочно снабдување по поконкурентни цени. Таа додаде дека можноста за субвенции ќе се разгледува во зависност од финансиските последици.

Божиновска уверува дека политичките случувања во Србија нема да влијаат врз планираните гасни проекти. Делницата кон Грција, долга 68 километри, треба да биде завршена околу јуни следната година, додека за делницата кон северната граница, долга 22 километри, веќе е избран изведувач. Нејзиното целосно завршување е планирано за 2028 година.