Премиерот Христијан Мицкоски изјави дека Владата нема да ги остави граѓаните сами да се справуваат со последиците од силното невреме што го зафати Скопје и најави дека штетите ќе бидат утврдени и надоместени согласно законските процедури.
Одговарајќи на новинарско прашање дали граѓаните ќе останат сами да се снаоѓаат со материјалната штета, Мицкоски рече дека институциите веднаш реагирале.
„Никогаш оваа влада не ги оставала граѓаните сами да се снаоѓаат. Им благодарам на институциите и на градоначалниците што во текот на вечерта и веднаш по невремето излегоа на терен и заедно со институциите во нивна надлежност ги санираа штетите. И денеска ќе продолжат, бидејќи станува збор за епско невреме“, изјави Мицкоски.
Тој нагласи дека по проценката на штетите ќе следува постапка за нивно обештетување.
„Штетите ќе се констатираат и согласно закон, искуството од минатото и праксата, од страна на надлежните институции сето тоа ќе биде рефундирано. Има механизми за помош. Апсолутно, како и во секоја елементарна непогода“, рече премиерот.
На новинарско прашање за поплаките на дел од вработените во ЈП „Паркови и зеленило“ дека не добиваат редовно плата, Мицкоски рече дека нема такви информации.
„Јас немам до мене таква информација дека вработените во „Паркови и зеленило“ не ја добиваат навремено платата“, изјави тој.
