„Стоилковиќ отворено работи за кинеска и руска агенда – директен удар врз стратешките интереси на Македонија“, вели Кузеска

Портпаролката на СДСМ и членка на Извршниот одбор, Богданка Кузеска, на денешната прес-конференција обвини дека вицепремиерот Иван Стоилковиќ води политика што, според неа, е во служба на кинески и руски интереси и претставува директен удар врз стратешките интереси на државата.

— реклама —

Кузеска истакна дека Стоилковиќ, кого го нарече еден од најблиските соработници на премиерот Христијан Мицкоски, јавно повикува на стратешка соработка со Кина, што според СДСМ е спротивно на евроатлантските определби на Македонија.

— реклама —

Во обраќањето таа посочи дека, како што рече, активностите поврзани со поддршката за српскиот претседател Александар Вучиќ, средбите со Милош Вучевиќ и патувањето во Кина заедно со делегација на Српската напредна странка имаат цел да го блокираат европскиот пат на Македонија.

Кузеска се осврна и на кредитот од една милијарда евра, за кој рече дека бил земен преку унгарскиот премиер Виктор Орбан, оценувајќи дека јавноста нема јасна информација како биле потрошени средствата.

— реклама —

Според СДСМ, новиот стратешки документ на Стејт департментот јасно укажува дека Кина и Русија се фактори кои настојуваат да го прошират своето влијание на Западен Балкан преку нестабилност и корупција.

— реклама —

Кузеска порача дека Македонија заслужува европска иднина, а не, како што рече, да биде заложник на туѓи интереси и авторитарни влијанија.