Стотина работници без работа: Фабрика во Кочани стави клуч на врата, бараат плати и К-15

Околу стотина работници од текстилната компанија „Артекс“ во Кочани останаа без работа, откако фирмата престанала со работа. Дел од вработените денеска излегоа на протест пред фабричките простории, барајќи одговор што ќе се случи со нивните работни места и со заостанатите примања.

— реклама —

Работниците тврдат дека компанијата им должи две неисплатени плати и регрес за годишен одмор (К-15). Според нив, со денови им било ветувано дека платите ќе бидат исплатени, но наместо тоа на дел од вработените им биле врачени решенија за спогодбен прекин на работниот однос.

— реклама —

— реклама —

Револтираните работници одбиле да ги потпишат документите и дел од нив ги искинале пред фабриката. Тие велат дека се загрижени за својата иднина и бараат институциите да се вклучат во решавањето на проблемот со неисплатените плати.

— реклама —

Затворањето на фабриката е уште еден удар за текстилниот сектор во источниот дел на земјата. Според информации од терен, во изминатата година повеќе од десет текстилни фабрики во регионот на Штип, Кочани и Делчево ставиле клуч на врата, при што голем број работници останале без работа, а дел и без заостанатите плати.