Гетеборг и Кочани – две трагедии, 126 згаснати млади животи и заедничка болка

Мајката на Андреј, кој го загуби животот во пожарот во дискотеката „Пулс“ во Кочани, се огласи на социјалните мрежи по повод 28-годишнината од трагедијата во шведскиот град Гетеборг, во која загинаа 63 млади луѓе.

Со емотивна порака, таа направи паралела меѓу двете трагедии, кои зад себе оставија семејства со ненадоместлива загуба и болка.

— реклама —

„28 години од трагедијата во Гетеборг – две трагедии, една болка“, напиша таа.

— реклама —

Во објавата потсети дека на 29 октомври 1998 година во пожарот во Гетеборг згаснале 63 млади животи, а на 16 март 2025 година истата црна бројка ја одбележа и трагедијата во Кочани, каде што загинаа 63 лица, а над 200 беа повредени.

Таа истакна дека семејствата од Кочани денес ја разбираат болката на семејствата од Гетеборг на начин на кој никогаш не посакувале да ја разберат. Преку меѓусебните посети, размената на искуства и човечката поддршка, меѓу двете заедници се создала силна врска на солидарност и надеж.

— реклама —

„Гетеборг и Кочани – 126 прерано згаснати животи и една заедничка обврска: никогаш повеќе!“, порачува мајката на Андреј.

На 29 октомври 1998 година, во магацин во близина на Баккаплан, во Гетеборг, бил организиран настан на кој присуствувале речиси 400 млади луѓе, иако просторијата била предвидена за најмногу 150 лица. Пожарот избувнал во противпожарното скалиште, а чадот брзо навлегол во просторијата каде што се одржувала забавата. Настанала паника, а стотиците млади се обидувале да излезат низ единствената достапна врата, широка само 90 сантиметри.

Во пожарот во Гетеборг загинале 63 млади луѓе на возраст од 12 до 25 години, а 213 лица биле повредени, од кои 50 се здобиле со тешки повреди со трајни последици. Меѓу загинатите имало и македонски државјани.