НАТО забрзано работи на зајакнување на одбраната на шведскиот остров Готланд во Балтичкото Море, кој сѐ повеќе се смета за една од најважните и најранливи точки на Алијансата во однос на Русија, објави „Политико“.
Стравувањата од можна руска агресија и хибридни напади, како и неизвесноста околу идната американска поддршка за европската безбедност, ги натераа Шведска и сојузниците повторно да го претворат островот во силно воено упориште.
Готланд се наоѓа на околу 300 километри од руската енклава Калининград и има клучна стратешка позиција за контрола на Балтичкото Море.
Шведска оваа недела ја заврши првата НАТО-вежба на островот по приклучувањето кон Алијансата во 2024 година. Во вежбата учествувале околу 18.000 војници од 13 држави, кои увежбувале одбрана од можен руски напад.
Шведскиот командант за одбрана Михаел Клесон предупреди дека руски напад „може да се случи во секој момент“, посочувајќи на зголемените руски активности, саботажи, дронови и шпионски инциденти во регионот.
Островот често се нарекува „непотоплив носач на авиони“ поради неговата улога во воздушните и поморските операции во Балтикот. Според шведските експерти, оној што го контролира Готланд, контролира голем дел од случувањата во Балтичкото Море.
Шведска веќе инвестирала повеќе од 200 милиони евра за модернизација на инфраструктурата, обновување на противвоздушната одбрана и распоредување тенкови и оклопни возила на островот. Во наредната година се очекува дополнително зголемување на бројот на војници.
Во текстот се наведува и дека американското учество во воената вежба било значително намалено, што се толкува како дел од поширокото намалување на американскиот ангажман во НАТО.
Вежбата покажала и колку современото војување со дронови ја менува воената стратегија, откако украински единици успешно симулирале уништување на шведските оклопни сили со беспилотни летала.
Шведските власти велат дека се подготвуваат за сите можни сценарија – од сајбер и хибридни напади до директен вооружен конфликт.
