Француските власти отворија истрага откако во близина на Божиќниот базар во Стразбур било пронајдено огнено оружје, потврди јавната обвинителка Кларис Тарон.
Наодот предизвика дополнителна загриженост бидејќи базарот, кој е отворен од средата, традиционално привлекува огромен број посетители и се смета за еден од најпознатите во Европа. Минатата година го посетија рекордни 3,4 милиони луѓе, меѓу кои туристи од Германија, САД и Шпанија, пренесува BFM.
Поради постојаната терористичка закана во Франција, градот и оваа година е ставен под строги безбедносни мерки. На улиците се распоредени засилени полициски патроли, а дополнителни контроли ќе се спроведуваат во текот на целиот месец, колку што ќе трае базарот.
Инцидентот, иако засега без информации за потенцијален осомничен, повторно ја актуелизира дебатата за ризиците што ги носат масовните собири во услови на висока безбедносна готовност.
