Минусни температури утринава во повеќе делови од земјава, снег на планините и најави за врнежи и силен ветер во текот на денот, информира Управа за хидрометеоролошки работи.
Најниската температура е измерена на Попова Шапка со минус три степени, додека минус еден степен е регистриран во Маврови Анови. Нула степени се измерени во Лазарополе и Крушево, додека еден степен во Ѓуриште, Пожаране и Радовиш. Два степени се измерени во Берово и Тополчани, три во Претор, четири во Охрид, Крива Паланка, Битола, Прилеп и Штип, пет во Виница, Тетово, Струмица и Куманово, шест во Скопје – Зајчев Рид, Велес, Демир Капија и Кавадарци, а најтопло било во Гевгелија со осум степени.
Во изминатите 24 часа најмногу врнежи се измерени во Маврови Анови – седум литри на квадратен метар, шест во Битола, пет во Охрид, три во Претор, Попова Шапка и Берово, два во Лазарополе, Виница и Тополчани, еден во Скопје – Зајчев Рид, Демир Капија, Крушево и Пожаране, додека во Велес, Прилеп, Струмица, Крива Паланка и Штип се измерени помалку од еден литар на квадратен метар.
Снежната покривка на Попова Шапка изнесува 57 сантиметри.
Според прогнозата, под влијание на циклонска активност денес ќе има врнежи кои на повеќе места ќе бидат пообилни, над 20 литри на квадратен метар, а поради продор на студен воздух, на планините и повисоките места дождот ќе преминува во снег.
„Под влијание на циклонска активност ќе има врнежи кои наместа ќе бидат пообилни (над 20 l/m²). Поради спуштање на ладна воздушна маса, на планините и некои од повисоките места врнежите од дожд ќе преминуваат во снег. Ќе дува засилен повремено силен ветер кој наместа ќе достигнува и над 70 km/h. Максималната температура ќе биде во интервал од 7 до 12 степени“, соопшти УХМР.
Во Скопје се очекува претежно облачно време со врнежи од дожд и засилен до силен ветер од северен правец.
„Во Скопје, претежно облачно со врнежи од дожд. Ќе дува засилен до силен ветер од северен правец. Максималната температура ќе достигне до 10 степени“, соопшти УХМР.
