Студентите и оваа година ќе добиваат 840 денари неделно за оброк: Пријавувањето почнува на 26 август

За академската 2026/2027 година, студентите кои ги исполнуваат условите повторно ќе можат да го користат правото на субвенциониран студентски оброк. Министерството за образование и наука го објави јавниот повик, а пријавувањето ќе се одвива електронски.

Право на финансиската поддршка имаат државјани на Македонија кои се редовни студенти на прв или втор циклус студии, како и студенти на интегрирани студии на државните и приватните високообразовни установи. Еден од условите е студентот да нема месечни приходи, по кој било основ, повисоки од минималната нето-плата во државата за тековната година.

— реклама —

Пријавувањето за тековните студенти, како и за оние кои ќе стекнат статус на студент во академската 2026/2027 година, ќе трае од 26 до 31 август 2026 година. Кандидатите треба електронски да ја пополнат и потпишат пријавата, како и изјавата за точност на податоците, а потоа документите да ги прикачат во електронската апликација.

— реклама —

Студентите кои нема да го остварат правото со овој повик или подоцна ќе го изгубат поради неисполнување на условите, ќе имаат можност повторно да аплицираат од октомври. Пријавувањето ќе биде отворено од 1 до 5 во секој месец од академската година, доколку повторно ги исполнуваат критериумите.

Субвенционираниот студентски оброк изнесува 140 денари дневно и може да се користи од понеделник до сабота за купување приготвена храна. Доколку средствата не се искористат во текот на неделата, ќе останат достапни на сметката до сабота.

— реклама —

Исплатата ќе се врши преку Шпаркасе банка АД Скопје, а студентите кои ќе го добијат правото ќе треба да склучат договор со банката за отворање посебна сметка поврзана со наменска платежна картичка. Ова ќе важи и за студентите кои претходно немале сметка во банката.

Од МОН дополнително ќе ги објават информациите за рокот и начинот на подигнување на картичките. Средствата ќе почнат да се исплаќаат во месецот по завршувањето на месецот во кој студентот аплицирал и го стекнал правото.

Дополнителните информации за условите и начинот на аплицирање се достапни во јавниот повик на МОН, а студентите за прашања можат да се обратат до Секторот за ученички и студентски стандард или на електронската адреса наведена во повикот.