Со концертот на полскиот квартет „Глам“ и американскиот пијанист Стен Брекинриџ заврши музичката програма на 66. издание на фестивалот „Охридско лето“, кое и годинава понуди низа настапи на реномирани уметници од земјава и од странство.
На завршниот концерт на музичката програма присуствуваше министерот за култура и туризам Седат Сулејмани, кој истакна дека фестивалот уште еднаш ја потврдил својата улога како место каде што преку уметноста се поврзуваат различни култури, традиции и уметнички изрази.
„Од првата вечер до денес, Охрид беше сцена на која се сретнаа различни култури, традиции и уметнички изрази, под отворено небо и на простори со вековна историја. Тоа е суштината на ‘Охридско лето’ – преку уметноста да ги поврзува луѓето и да отвора нови хоризонти“, истакна Сулејмани.
Тој потсети дека годинашното издание започна со гала-концертот „Љубов“, на кој настапија Ермонела Јахо од Албанија и Чарлс Кастроново од САД, во придружба на оркестарот на Националната опера и балет, под диригентската палка на Марко Боеми.
Според министерот, фестивалот зад себе остава голем број концерти, претстави и средби со врвни уметници, а рекордната посетеност е показател дека публиката ја препознава неговата вредност и значењето на културата.
Министерството за култура и туризам, како што нагласи Сулејмани, ќе продолжи да биде партнер и поддршка на „Охридско лето“, фестивал кој повеќе од шест децении претставува еден од столбовите на македонскиот културен живот.
„Наша обврска е да ја чуваме оваа традиција, да го поддржуваме врвниот уметнички квалитет и да создадеме услови ‘Охридско лето’ да продолжи да расте, да се развива и да биде фестивал отворен за сите“, рече Сулејмани.
Со музичкиот концерт заврши концертниот дел од фестивалската програма, додека целото 66. издание на „Охридско лето“ ќе биде затворено вечерва со македонскиот мјузикл „Као какао“, инспириран од музиката на Влатко Стефановски.
