Меѓународната агенција за енергија предупреди дека глобалните резерви на нафта се намалуваат со рекордно темпо поради нарушувањата во транспортот низ Ормускиот Теснец, што дополнително ја зголемува опасноста од нестабилност на цените.
Според Меѓународната агенција за енергија, светскиот пазар на нафта веројатно ќе остане во дефицит до последниот квартал од годинава.
Прелиминарните податоци покажуваат дека глобалните резерви во март се намалиле за 129 милиони барели, а во април за уште 117 милиони.
Падот следуваше по американските и израелските напади врз Иран и нарушувањата во извозот на нафта од Персискиот Залив.
Најголем пад е регистриран во земјите на ОЕЦД, каде што копнените резерви се намалиле за 146 милиони барели.
Од Меѓународната агенција за енергија соопштија дека загубите во снабдувањето со сурова нафта од производителите во Заливот веќе надминале милијарда барели, а повеќе од 14 милиони барели дневно не можат да ја напуштат регијата.
Агенцијата ја опиша ситуацијата како „невиден шок во снабдувањето“.
Во обид да се стабилизира пазарот, Меѓународната агенција за енергија уште во март најави ослободување на 400 милиони барели од итните резерви на земјите членки, од кои досега се искористени околу 164 милиони.
Во меѓувреме, Саудиска Арабија и Обединетите Арапски Емирати пренасочиле дел од извозот преку терминали надвор од Ормускиот Теснец, додека САД и други производители го зголемиле извозот кон Азија.
Меѓународната агенција за енергија очекува и глобалната побарувачка за нафта во 2026 година да се намали за 420.000 барели дневно, најмногу поради слабата економска активност и високите цени на горивата.
