Светската здравствена организација го подигна нивото на ризик од ширење на сојот ебола „бундибугио“ на „многу високо“ во Демократска Република Конго, предупредувајќи дека постои сериозна опасност вирусот да прерасне во национална епидемија.
Станува збор за сој на вирусот за кој засега нема одобрена вакцина или лек. СЗО пред пет дена ја прогласи ситуацијата за меѓународна здравствена закана.
Генералниот директор на СЗО, Тедрос Аданом Гебрејесус, изјави дека ризикот е „многу висок“ на национално ниво, „висок“ на регионално и „низок“ на глобално ниво.
Досега во Конго се потврдени 82 случаи на зараза, седум лица починале, а под сомнеж се уште 177 смртни случаи и околу 750 заразени.
Од СЗО посочуваат дека ситуацијата во Уганда засега е стабилна, благодарение на строгото следење на контактите и ограничувањето на масовните собири.
Според организацијата, епидемијата најверојатно започнала пред два месеца, но била официјално прогласена дури минатата недела.
„Вирусот и натаму се пренесува и бројот на случаи уште некое време ќе продолжи да расте“, предупреди претставничката на СЗО во Конго, Ен Ансија.
