СЗО предупредува: Епидемијата на ебола во Конго може да биде четирипати поголема од официјалните бројки

Светската здравствена организација (СЗО) предупреди дека вистинскиот обем на епидемијата на ебола во Демократска Република Конго би можел да биде два до четири пати поголем од официјално регистрираниот број на случаи.

— реклама —

Директорот за вонредни состојби во СЗО, Чикве Ихеквезу, изјави дека дури 80 проценти од новите случаи во жариштето на епидемијата во Бунија, во провинцијата Итури, не се поврзани со веќе познати контакти на заразените, што укажува на широко, неконтролирано ширење на вирусот.

Во областите каде што има помал број случаи, како што е провинцијата Северен Киву, речиси сите новозаразени се идентификувани преку листите на контакти, што, според СЗО, претставува знак на напредок во контролата на епидемијата.

— реклама —

Според најновите податоци на властите во Конго, објавени во четвртокот, еболата досега погодила 1.792 лица, а 625 починале како последица на инфекцијата.

— реклама —

Ихеквезу посочи дека анализите на СЗО покажуваат оти голем број случаи остануваат нерегистрирани, а дополнителна загриженост предизвикува фактот што многу заболени не добиваат навремена медицинска помош.

„Колку подолго заразените остануваат надвор од здравствениот систем, толку е поголема веројатноста да го пренесат вирусот. Загрижува и тоа што околу 70 проценти од првите 400 смртни случаи се случиле надвор од центрите за лекување“, изјави тој.

— реклама —

За да се ограничи ширењето на болеста, властите започнаа обука на околу 21.000 здравствени работници, кои ќе посетуваат домаќинства, ќе ги идентификуваат сомнителните случаи и ќе ги охрабруваат лицата со симптоми што побрзо да побараат медицинска помош.