СЗО предупредува: Вистинскиот број заболени од ебола во Конго може да е четирипати поголем

Реалниот број на заразени со ебола во Демократска Република Конго е значително поголем од официјално потврдените случаи и би можел да биде дури четирипати повисок, предупреди денеска Светската здравствена организација (СЗО).

— реклама —

Извршниот директор на Програмата за здравствени итни состојби при СЗО, Чикве Ихеквеазу, изјави дека анализите и математичките модели покажуваат оти вистинскиот обем на епидемијата е најмалку два до четири пати поголем од официјално регистрираниот број случаи.

— реклама —

Според последните податоци, во Демократска Република Конго се потврдени 1.873 случаи на ебола, од кои 672 завршиле со смртен исход.

— реклама —

Во меѓувреме, на североистокот на земјата се спроведува клиничко испитување на два експериментални лека против сојот Бундибугио на вирусот ебола. Проектот го реализираат универзитети, фармацевтски компании и Светската здравствена организација, а целта е да се утврди дали новите терапии ќе ја намалат смртноста кај заболените.

— реклама —

Во испитувањето се користат антивирусниот лек ремдесивир, кој веќе е во употреба, и експерименталниот препарат MBP134, кој содржи антитела способни да го препознаат и да го неутрализираат вирусот. Стручњаците очекуваат новите терапии да дадат подобри резултати, откако претходно покажале охрабрувачки ефекти во испитувања врз животни.