Температури до 40 степени во Грција: Црвениот крст им дели вода и капчиња на туристите на Акропол

И покрај топлотниот бран и температурите во Атина, кои достигнуваат и до 40 степени, илјадници туристи не се откажуваат од посетата на Акропол. Поради екстремните временски услови, грчкиот Црвен крст спроведува акција за помош и информирање на посетителите, на кои им дели ладна вода, капчиња и лепези.

Директорот за комуникации на грчкиот Црвен крст, Константинос Гаврилидис, за МИА вели дека дел од туристите пристигнуваат неподготвени за високите температури, особено оние кои доаѓаат од северните земји, каде што не се навикнати на вакви услови.

— реклама —

„За жал, бидејќи во многу случаи имаме туристи кои доаѓаат од северните земји или од земји каде што не се соочиле со вакви температури, многу од нив не се соодветно подготвени, ниту во однос на облеката, ниту на обувките, за овие исклучително тешки и високи температури“, вели Гаврилидис.

Дел од посетителите пристигнуваат со чадори, капчиња, мини-вентилатори, шишиња вода и лесна летна облека. Сепак, има и туристи кои, иако знаеле дека температурите може да достигнат 40 степени, пристигнале без соодветна заштита.

— реклама —

Една млада туристка од САД дури побарала капче од волонтерите на Црвениот крст пред да се упати кон Акропол.

Од грчкиот Црвен крст велат дека во соработка со Министерството за култура редовно се присутни на Акропол за време на екстремно високите температури.

— реклама —

„Целта е да обезбедиме упатства за справување со топлотниот бран, топлотниот удар и високите температури, како и мерки за заштита, како што се капи, лепези, креми за сончање и, секако, ладна вода“, објаснува Гаврилидис.

Во моментов, на посетителите на Акропол им се делат меѓу 2.500 и 3.000 шишиња ладна вода.

— реклама —

Од Црвениот крст додаваат дека веќе имале неколку интервенции за помош на лица на кои им се слошило поради високите температури.

И покрај екстремните временски услови, бројот на посетители не се намалува значително. Особено туристите кои пристигнуваат со крузери имаат ограничено време во Атина и најчесто немаат голем избор околу посетата на Акропол.