Тензии во Ормускиот теснец: Американски воени бродови поминаа, еден се повлече откако Иран се закани дека ќе го гаѓа

Неколку воени бродови на Американска морнарица поминале низ Ормускиот теснец, во потег што дополнително ги зголеми тензиите со Иран.

— реклама —

Според американски извори, операцијата не била координирана со Техеран и имала за цел да ја врати довербата кај трговските бродови и да обезбеди слобода на пловидба низ меѓународните води.

— реклама —

Од иранска страна, пак, беше соопштено дека еден американски брод се повлекол откако добил предупредување дека ќе биде гаѓан во рок од 30 минути доколку продолжи да се движи кон теснецот. Според Техеран, пораката била пренесена преку посредник од Пакистан.

Овие случувања се одвиваат паралелно со мировните преговори меѓу САД и Иран, при што повторното отворање на Ормускиот теснец е една од клучните точки во евентуалниот договор.

— реклама —

И покрај најавеното примирје, поморскиот сообраќај низ теснецот останува значително намален, а американски претставници признаваат дека дел од бродовите избегнуваат да минуваат поради безбедносни ризици.

Во меѓувреме, Доналд Трамп најави почеток на операции за расчистување на морски мини, со цел нормализирање на пловидбата во овој клучен глобален коридор.